Komedia e suksesshme “Boeing Boeing”, rikthehet në ditët e fundit të vitit në teatrin Eksperimental

0
477

Komedia “Boeing Boeing”, vepra e autorit francez Marc Camoletti me regji nga Kiço Londo pas një turi të suksesshëm në skena të tjera rikthehet për publikun në Teatrin Kombëtar Eksperimental “Kujtim Spahivogli”. Mbrëmjet e datave 27, 28 dhe 29 dhjetor në skenën teatrore për publikun shfaqet një nga komeditë e njohura me vlerësime në botë, por dhe në teatrin tonë. Në muajin e fundit të vitit që po mbyllet regjisori Kiço Londo shprehet se kjo komedi deri tani është vënë 65 herë në skena të ndryshme, dhe rikthehet për të qenë për publikun në atmosferën e festave. “Komedia “Boeing Boeing” do të vijë për tre mbrëmje me radhë në skenë për publikun. Komedia është shfaqur deri tani 65 herë në skena, dhe në ditët e fundit të viti ne e rikthejmë sërish për publikun, për të krijuar dhe një atmosferë festive” shprehet regjisori Kiço Londo. Vepra e autorit francez Marc Camoletti i takon rajonit Durrës-Lezhë me shfaqjet, që ka ndërmarrë Teatri Kombëtar Eksperimental. Me regji nga Kiço Londo është në skenë me aktorët Amos Muj Zaharia, Rudina Dembacaj, Gentian Zenelaj, Alessia Xhemalaj, Adriana Tolka dhe Linda Jarani. Ngjarjet e veprës ndodhin në Paris në ditët e sotme. Një komedi e bujshme, në venat e së cilës rrjedh gjak si ai i komedive të Shekspirit me incidente të hareshme dhe ngatërrim identitetesh, “Boeing Boeing” paraqet aventurat dashurore të beqarit francez Bernard me stjuardesat e tij bukuroshe. Tri stjuardesa njëra më e bukur se tjetra, një franceze një gjermane dhe një amerikane, secila duke besuar se është e fejuara e Bernardit. Më parë Bernardi ka ditur t’i xhonglerojë këto gra, falë zotërimit të orarit të detajuar të fluturimeve të tyre. Kur situata ndryshon dhe të tria gratë e tij mbërrijnë në apartament në të njëjtën ditë, Bernardi me ndihmën e shokut të tij Robert lufton me të gjitha mënyrat, që ato të mos e marrin vesh të vërtetën. Bernard e mban njërën në ajër, njërën në tokë dhe tjetrën të varur. Komedia fillon në momentin kur fati i sjell të gjithë personazhet në të njëjtin vend, pikërisht në shtëpinë e Bernardit. Ai arrin të dal nga situata falë mikut të tij, Robert.

Vepra dhe mesazhet

Vepra franceze është e përkthyer nga Nasi Lera, me skenografi nga Genta Qyrku, kostumografe  Realda Malo dhe art-design Klea Mani. Regjisori Kiço Londo, i cili me këtë vepër ka qenë dhe në skena të teatrove të tjerë më parë është shprehur se është një komedi që jep mesazhe njerëzore. “Një komedi e mençur, e zgjuar dhe që jep mesazh mjaft njerëzor që pavarësisht nga keqkuptimet dhe aventurat e shumta, kur aventurat që na kushtojnë përfundojnë mirë, çdo gjë është mirë”, ka pohuar regjisori Londo. Me role të ndryshme në skenën e teatrit në këtë komedi franceze aktorja e re Alessia Xhemalaj vjen si stjuardesa Zhaklin në “Boeing Boeing”. Ajo shprehet se roli i saj është një vajzë plot jetë dhe e mbushur me dashuri, ku qëllimi i saj është familja. “Personazhi që unë interpretoj është stjuardesa franceze, Zhaklin. Një vajzë plot jetë shumë aktive dhe e mbushur me dashuri për të fejuarin e saj. Qëllimi i saj është familja dhe dëshiron të martohet sa më parë për të qenë në krahët e Bernardit. Bashkë me regjisorin Kiço Londo jemi përpjekur ta sjellim personazhin me shumë elegancë, sharm dhe autoritet në të njëjtën kohë. E gjithë komedia është e ndërtuar kështu, është një punë e bërë me dëshirë dhe impenjim”, thotë aktorja Xhemalaj, që këtë herë është në veprën e francezit Marc Camoletti. Gjatë kësaj kohe në skenën e Teatrit Kombëtar Eksperimental “Kujtim Spahivogli” janë vënë në skenë vepra të ndryshme, por me komedinë franceze të autorit Marc Camoletti mbyllet dhe ky vit artistik.

Nga Julia Vrapi

LEAVE A REPLY

Please enter your comment!
Please enter your name here