Leka Bungo, sonte me dramën “Prostituta”në skenën e Korçës

0
525

Drama “Prostituta” sipas autorit Leka Bungo është një histori e vërtetë deri në dhimbje. Ajo zë fill në vitet ‘90 ku një 16 vjeçare bie pre e prostitucionit dhe pas shumë vitesh gjithçka kërkon është hakmarrja. Drama këtë të diel është në skenën e teatrit “Andon Zako Çajupi” në Korçë dhe si autor dhe regjisor i saj Bungo tregon se vepra është shkruar gjatë qëndrimit të tij në Amerikë. “Drama është shkruar shumë vite më parë. Kur jetoja në New York. Isha larg Shqipërisë dhe isha i bindur që problemi që trajtonte, gjeta ime, ishte një nga problemet më serioze të shoqërisë shqiptare. Problem, i cili me kalimin e viteve edhe u agravua më shumë. Nuk është se gjeti një zgjidhje. Ndërsa për sa i përket asaj se pse pikërisht tani kur drama është shkruar me kohë, ajo s’varej nga unë. Këtë dramë Teatri Kombëtar e kishte. E dorëzova për ta vënë në skenë dhe nuk e miratoi”, thotë Leka Bungo, autor dhe regjisor. Përjetimet dhe kujtimet e saj vijnë në skenë nëpërmjet interpretimit të Julinda Emirit, përkrah aktorëve me emër si Viktor Zhusti, Bujar Asqeriu, Mehdi Malha, Natasha Sela e Vangjel Toçe. Drama fillon kur ajo kthehet nga Italia në Shqipëri, dhe vjen për tu hakmarrë ndaj atij që e çoi në Itali, por atë e gjen deputet. Autor në vepër Leka Bungo tregon se ai që sot është deputet dikur ka qenë dikur skafist në Vlorë. “Hakmarrja që kërkon të bëjë ajo është krejt origjinale sipas mendimit tim. Ajo përcjell një mesazh, që është pothuajse edhe në Bibël i shënuar, që do të thotë njerëzit duhet të falin jo të hakmerren, kjo është një nga tezat e Biblës. Unë këtë e kam shtruar si problem në konfliktin themelor të dramës, dhe kjo tenton të përçojë mesazhin e saj, që njeriu duhet të falë dhe jo hakmerret. Mirëpo hakmarrja sipas personazhit kryesor është si orgazëm për njerëzit, dhe lufta që bëhet është ndërmjet dy ndjenjave të fuqishme, që ekzistojnë te njeriu, falja dhe hakmarrja. Dhe personazh kryesor në vepër veç kësaj gruaje është prifti, që mishëron këto ide që trajtohen te Bibla, që është pro faljes dhe zemërgjerësisë dhe kundër hakmarrjes. Por hakmarrja e kësaj gruaje është e veçantë”, shprehet mes të tjerave regjisori Leka Bungo.

LEAVE A REPLY

Please enter your comment!
Please enter your name here